Vilbali di dilibbarazioni di la Gjunta Cumunali nr. 3 di la dí 27 di gjinnaggju 2022

Pruggjettu "Lu gaddurésu pa' li gaddurési", finanziatu da la leggji 482 di lu 1999 (altículi 9 e 15) e da la leggji regionali 22 di lu 2018 (annualitai 2021).

COMUNI DI LOCUSANTU

Pruíncia di Sàssari

VILBALI DI DILIBBARAZIONI DI LA GJUNTA CUMUNALI NR. 3 DI LA DÍ 27 DI GJINNAGGJU 2022

UGGJETTU: APPRÓU DIFINITIVU LU CÓDICI NÓU DI CUMPULTAMENTU DI LI DIPENDENTI DI LU COMUNI DI LOCUSANTU

L’annu duimili’e vintidui, la dí vintisetti di lu mési di ’jinnaggju a mezudí, illa Casa Cumunali s’è riunita la Gjunta Cumunali prisiduta da lu Geom. Agostino Pirredda illa só galitai di Síndacu e cu lu intilventu di li Sigg. Assessóri:

• GALA Salvatore
• CIBODDO Barbara
• OCCHIONI Giovanni Paolo
• Assenti li Cunsiddéri Sigg.:
• LORIGA Antonio

Avvilguata la legalitai di l’adunànzia pa lu ’nnúmmaru di li passoni intilvinuti pidda la presidènzia lu Geom. Agostino Pirredda illa só galitai di Síndacu cu l’assistu di lu Sigrittàriu Cumunali Dr.ssa Gabriella Memmoli.

UGGJETTU: APPRÓU DIFINITIVU LI CÓDICI NÓU DI CUMPULTAMENTU DI LI DIPENDENTI DI LU COMUNI DI LOCUSANTU

Cunfolm’a l’Alt. 1 di lu Regulamentu di funziunamentu di la Gjunta Cumunali in mudalitai a distànzia, appruatu cun dilibbarazioni di G.C. nr. 61 di la dí 21.10.2020, lu Síndacu Agostino Pirredda, lu Vicesíndacu Salvatore Gala e l’Assessóri Barbara Ciboddo e Giovanni Paolo Occhioni píddani palti a la siduta d’oggjindí in mudalitai a distànzia cun videocunfirènzia.

LA GJUNTA CUMUNALI

VISTA: la prupposta di dilibbarazioni di lu Sigrittàriu Cumunali – RCPT;

RICJAMATA la só dilibbarazioni prizzidenti nr. 78 di la dí 21.12.2021, esecutiva cunfolm’a la leggji, ch’à par uggjettu: “Rivisioni códici di cumpultamentu di li dipendenti cumunali: appróu documentu preliminari”, cun chi è statu ditilminatu di:

1. appruà in via preliminari la bozza di lu códici di cumpultamentu di lu Cumuni di Locusantu;
2. suttapuní dittu documentu a la pruzzidura abbalta di palticipazioni pal mezu di pubblicazioni di lu stessu illa pàgina Albo Pretorio Online e illa sezioni Amministrazione trasparente > Disposizioni.generali > Atti.generali;

DATU ATTU chi la dí 21.12.2021, sia ill’albu pritóriu online chi illu situ istituziunali so stati pubblicati l’atti sighenti, ammiriati a avvià la pruzzidura abbalta di palticipazioni pal pudé arrià a l’aduzioni difinitiva di lu Códici di Cumpultamentu di l’Enti:

• Avvisu di pruzzidura abbalta cu lu invitu a tutti li ch’ani intaressu a fa arrià eventuali pruposti d’intigrazioni;

• Bozza di lu documentu preliminari appruatu cu la dilibbarazioni nr. 78/2021;

• Códici naziunali di cumpultamentu di li dipendenti púbblichi (D.P.R. nr. 62/2013);

• Dilíbbara ANAC nr. 177/2020, cuntinenti li réguli pa’ la revisioni di li códici di cumpultamentu;

ATTESU chi a lu tèlmini fissatu pa la dí 31.12.2021 no risulta palvinuta nisciuna pruposta intigrativa, cussicchè si pó pruzzidí a l’appruazioni difinitiva di lu documentu appruatu in via preliminari cu la dilibbarazioni mintuata nr. 78/2021;

RICJAMATI li Réguli (Linee Guida) in matéria di Códici di cumpultamentu di l’amministrazioni púbblichi, appruati cu la dilíbbara nr. 177 di la dí 19 di friaggju 2020 di l’Autoritai Naziunali Anticurruzioni (ANAC), e datu attu chi so stati ussilvati tutti l’ingjitti a lu scopu fruniti da palti di l’Autoritai Naziunali Anticurruzioni;

RITINUTU dunca, cunfolmu a li Réguli ANAC supramintuati, di pruzzidí a l’appróu difinitivu di lu códici e a li fasi sighenti di pubblicazioni e infulmazioni a tutti li dipendenti cumunali;

VISTI:

• lu Dicretu di lu Presidenti di la Ripúbblica di la dí 16 d’abbrili 2013, nr. 62, cu l’uggjettu “Rigulamentu cuntinenti lu códici di cumpultamentu di li dipendenti púbblichi“, cunfolmu a l’altículu 54 di lu Dicretu legislativu 30 malzu 2001, nr. 165;

• l’alt. 54 comma 5 di lu D.lgs. 30 malzu 2001, nr. 165 e ss.mm.ii.;

• lu D.lgs. nr. 267/2000 e ss.mm.ii.;

• la Leggji nr. 190/2012 e ss.mm.ii.;

• la Custituzioni di la Ripúbblica Italiana, chi imponi chi li funzioni púbblichi síani svolti cu impalzialitai (alt. 97), a lu silvíziu esclusivu di la Nazioni (alt. 98) e cun “disciplina e onóri“ (alt. 54, co. 2);

• lu Pianu vigenti di Prevenzioni di la Curruzioni e di la Trasparènzia, triénniu 2021/2023, appruatu cu la dilíbbara di la Gjunta Cumunali nr. 10 la dí 17.03.2021;

Cun voti cuncoldi e unànimi palisati cunfolm’a la leggji;

DILÍBBARA

1. D’appruà in via difinitiva lu códici di cumpultamentu di lu Comuni di Locusantu, alligatu a chista dilibbarazioni, chi si cumponi di 23 altículi;

2. Di dispuní la pubblicazioni di lu “códici“ in Amministrazione trasparente / Disposizioni Generali / Atti generali e la trasmissioni di lu mattessi códici a tutti li dipendenti di lu Comuni di Locusantu;

3. Di dà attu chi chistu códici anda a sustituí intigralmenti lu códici di cumpultamentu aduttatu cu la dilibbarazioni di la Gjunta Cumunali nr. 73 di la dí 18.12.2013.